Nangawat og mahalon nga chocolate ang usa ka 20-anyos nga amahan sulod sa usa ka Supermarket sa N. Bacalso Ave. Brgy. Pahina Central, Dakbayan sa Sugbo alas 6:00 pasado sa gabii, Mayo 19, 2025
Ang dinakpan nasikop sa security guard sa tindahan ug nailhan lamang sa pangalan nga si “John Lloyd”, dunay kapuyo, ug lumad nga taga-Riverside, Barangay Banawa ning siyudad. Subay sa imbestigasyon sa Carbon Police, gi-turnover sa customer assistant ug sa sikyu sa Supermarket ang suspek dihang ilang nabantayan nga nanguha kini og mga baligya og gisulod sa iyang back pack nga wala mobayad.
Niangkon ang dinakpan nga nabuhat niya ang maong salaod tungod sa kawad-on ug aron aduna siyay ikapalit og gatas sa iyang anak kon mabaligya niya ang mga nakawat nga chocolates.
Nakuha sa posisyon gikan sa maong suspek ang dili momenos 40 ka mga chocolate nga moakabat og kinatibuk-ang kantidad nga P5,680. Mag-atubang siya og kasong kalapasan sa pagpangawat. / JDG