Nilahos sa paggawas ang 28 anyos nga dalaga sa usa ka tindahan sa Barangay Bulacao, Dakbayan sa Sugbo, dala sa iyang gipamili nga goods nga wala moagi sa kahera aron mobayad, ang gidakop sa guwardiya.
Nasikop ang maong babaye nga gitago sa pangalan nga Pearly niadtong alas 6:10 sa gabii, Miyerkules, Mayo 28, 2025, sa dihang yano rang nigawas sa tindahan nga wala motunol sa iyang bayad ngadto sa cashier.
Si Pearly nga taga Private Riverside, Brgy. Sambag 1, Dakbayan sa Sugbo ang gi-turnover sa nakadakop nga guwardiya ngadto sa Inayawan Police Station.
Nakuha gikan niya ang upat ka botelya nga whitening lotion nga nikantidad og kapin sa P1,000 ug duha ka t-shirt nga mokabat ngadto sa kapin sa P600.
Nasayran nga dili diay kini ang unang higayon nga nadakpan ang suspek sa pagpa-shoplift ug giingong aduna siyay grupo nga pulos sab mga shoplifter.
Nagdumili si Pearly sa pagtubag sa pangutana sa Superbalita Cebu ug igo lang niingon nga iyang atubangon ang maong kaso nga shoplifting batok kaniya. / GPL