Nagkatibuwaag ang mga nagduwa og volleyball human gipusil-patay sa duha ka mga tawo ang usa ka lalaki sa Purok Caimito, Brgy. Lagtang, siyudad Talisay, alas 6:50 sa gabii sa Dominggo, Enero 28, 2024.
Ang biktima giila nga si Erby Linganay, 43, minyo, taga Purok Caimitohan, Brgy Lagtang, Talisay City. Duha ka wala mailhing mga lalaki nga nagsul-ob og itom nga jacket ug maong pants ug nag- face mask og kolor itom ang killers.
Sa pakisusi sa Superbalita Cebu, nasuta sa imbestigasyon sa kapulisan sa Talisay gikan sa amahan sa biktima nga samtang nagduwa og volleyball ang iyang anak, ning-abot ang duha ka wa mailhing mga lalaki, usa niini nipusil sa biktima nga dul-it sa ulo nga niresulta sa diha-diha nga kamatayon.
Ang duha ka mga killer ningsibat sakay sa usa ka motosiklo ug wa na maabti sa mga polis.