DUHA ang nakalas sa nahitabong pagpamusil sa Lucas Compound, Bayabas Extension, Barangay Punta Princesa sa dakbayan sa Sugbo, alas 7:50 sa gabii, Martes, Pebrero 18, 2025.
Ang mga nangamatay giila nga sila si; Nicardo Nombrado, 59, ug George Kyle Lucas, 39, retired US Navy nga pulos nagpuyo sa maong dapit.
Ang suspetsado nga naa sa tambalanan sa dihang nasamdan human napusilan sa tiil mao si Kevin Asia, hingkod ang pangidaron, silingan ra sab sa mga biktima.
Nasayran base sa imbestigasyon sa Labangon Police Station nga misulod si Asia sa maong compound nga gihulagway nga nagwala a residente tungod kay wala siya mailhi nga tungod ani gi abog ni sa mga molopyo nga mogawas.
Giingong nagdumili sa paggawas nga maoy hinungdan nga ang mga nagpuyo sa dapit nagkuha og mga bunal lakip na ang baseball bat nga gigunitan ni Nicardo Nombrado.
Apan nag wild na hinuon ang suspetsado nga si Asia ug giilog ang dalang baseball bat ni Nombrado hangtod nga naglamok-lamok na ug gipangbunal-bunalan niya ang mga tawo.
Ang retired US Navy nga nakabati sa kagubot migawas kini bitbit ang armas aron mopasalba apan siya na usab ang gi dasdasan sa suspek.
Matud ni Police Major Timothy Jim Romanillos, hepe sa Labangon Police Station gipusil sa tiil ang suspetsado aron matumba apan misamot na hinuon ka-isug si Asia ug giilog ang dala nga armas sa retired US Navy nga maoy hinungdan nga midagan kini sulod sa iyang balay.
Sa dihang nailog na ang armas unang gipusil ni Asia si Nicardo sa liog nga mi resulta sa iyang hinanali nga kamatayon ug gisulod usab niya sa balay sa US Navy ug didto gipusil maka-upat ka higayon.
Nadakpan ang suspek sa dihang gidumog na siya sa mga tawo sa dapit ug gidala sa tambalanan.
Matud ni Romanillos nga bisan wala nila ma drug test ang suspetsado posibling lango kini sa illegal nga drugas tungod kay base sa pamahayag sa mga resident sa dapit isug kaayo.
“Pagka human inilugay sa baseball bat nag inilugay napud sila sa firearm, pag inilugay nila napusilan nila ang suspect sa tiil, nisamot man hinuon ka isug kay abi nila ma neutralized unta to ba nailog ang pusil. Ang kining mga biktima maoy napusilan, ang katong victim 1 naigo sa liog natumba katong makita sa gawas sa balay ang katong usa naigo pud niya gisundan pa gyud gitiwasan,” matud ni Romanillos.
Sa nakuha nga impormasyon ni Romanillos nga si Asia nausab na ang batasan human mamatay ang iyang kapikas nga usa ka nurse niadtong miaging tuig gumikan sa cancer.
Giingong nagpabuhi nalang siya sa iyang maguwang nga naa sa gawas sa nasud nagtrabaho ug daw nagpasagad nalang usab ni sa iyang kaugalingon.
Ang mga silingan ni Asia nitug-an nga kulatahon niini ang iyang anak kung mogawas sa ilang balay ug madungog nalang nila ang singgit sa anak nga maghilak kay gidapatan.
Nagtuo sila nga mogamit sa illegal nga drugas ang maong suspetsado kay nausab na ang batasan niini.
“Karon rako nakabantay ana niya nga murag nausab ang utok kay sige guro na siya og take og drugas kay iya man ingun anaon ang iyang anak,” matud ni alyas Nita nga silingan sa suspetsado.
Kasong double murder ang ipasaka sa Labangon Police batok sa dinakpan. / AYB