Papau New Guinean nga tinun-an sa kursong Hospitality Management sa usa ka dakong unibersidad sa downtown area sa dakbayan sa Sugbo gipadakop tungod sa tumang ka hubog ug nag wild sulod sa iyang boarding house sa dalan Bonifacio, Barangay Day-as, dakbayan sa Sugbo.
Ang gibalhog sa Parian Police Station giila nga si Michael Omene, 22, nag-abang og lawak sa 165 Bonifacio Street.
Sa imbestigasyon sa kapulisan, nag-inom ang maong tinun-an nga langyaw uban sa iyang mga higala pasado ala 1:00 sa Lunes sa hapon, Abril 8, 2024.
Pag-abot sa alas 10 sa gabii, labihan na kahubog sa maong langyaw ug dili na mapugngan bisan unsaon nila sa pagbadlong.
Gipangguba niini ang gamit sa iyang kwarto ug giapil na niini ang kasikbit nga mga lawak sa boarding house hinungdan nga nanawag na og polis ang tag-iya sa panimalay.
Dakong kadaot ang namugna ni Omene kay ang mga cabinet sa matag kwarto iyang gipangguba. Giingong dili lang kini ang unang higayon nga naalarma sa Parian police station ang maong langyaw.
Nadakpan na usab kini niadtong Agusto 2023 human manglabni og cellphone sa dihang nagduwa og mobile legend ang tag-iya niini.
Napulo palang ka buwan nga naa sa dakbayan sa Sugbo ang Papau New Guinean alang sa iyang pagtungha sa kolehiyo.
Matod sa mga polis sa Parian police station nga buotan ang maong langyaw kon dili mahubog. / AYB