Namatay ang usa ka 63 anyos nga lalaki human pusila sa wa mailhing lalaki pasado alas 10 sa buntag sa Huwebes, Pebrero 22, 2024, sa Sitio Cabancalan 2, Barangay Bulacao, dakbayan sa Sugbo.
Ang biktima mao si Juan Ordeñiza, lumolupyo sa lugar, kinsa nakaangkon og samad pinusilan sa ulo ug buko-buko.
Matod sa iyang higala nga si Francisco Tabada nga sa wala pa pusila si Ordeñiza, nanghagad pa kini kaniya nga mag-inom sa ilimnon nga makahubog.
Apan sa pag-abot sa gate sa parking area, matod ni Tabasa, kalit lang nga giduol sa usa ka lalaki ug gipusil sa makatulo ka mga higayon.
Nakita ni Tabada ang dagway sa gunman apan wala siya makaila niini ug dili usab niya sinati ang bayhon.
Apan kon iya ning makita pag-usab, posibling iya kining mailhan sanglit nahitabo ang krimen sa iyang atubangan mismo.
“Diri ko gasandig ko, diri aning paril kay gikan man ko namahaw nya gipusil man lag kalit. Ang suspek galakaw ra ug kon makakita ko sa nawong karon, murag makaila ko,” matod ni Tabada.
Usa sa mga naninda og sud-an sa lugar nga dili lang magpahingalan niingon nga dunay daghang mga tawo niadtong orasa nga nangaon.
Apan wala sila nakabantay sa pag-abot sa mamumuno.
Tulo ka mga buto usab sa armas ang iyang nabati ug ang mga tawo nangalibwag og panagan sa kahadlok.
“Kami, Sir, wala na gyud mi makakita sa pagpusil. Ang ako na lang nakita nga natumba nana si John (Juan Ordeñiza),” matod sa tag-iyag sa kan-anan.
Si Police Major Jeciree Basitao, hepe sa Inayawan Police Station, nagkanayon nga base sa inisyal nga imbestigasyon sa iyang mga personnel, grudge ang motibo.
Giingong dunay gikalalis ang biktima may kalabutan sa trabaho isip caretaker sa maong pribadong parking lot nga gipanag-iya sa pamilyang Aznar.
Sigun sa ubang mga saksi, ang gunman ilang nailhan ug sekreto sila nga ninghatag og impormasyon sa kapulisan.
Ang mamumuno dunay kaso ug nadakpan na niadto sa Inayawan Police Station.
“Karon naa tay witness nga naka identify sa suspect. Ang atong gihimo karon mao ang hot pursuit operation,” matod ni Basitao.
Ang manghod sa biktima nga dili lang magpahingalan nasubo sa nahitabo sa iyang maguwang nga iyang gihulagway nga buotan.
Wala usab silay kasayuran kon duna bay gikaaway ang biktima nga maoy hinungdan nga siya gipusil.
Ang mga sakop sa Scene of the Crime Operation (Soco) nakakuha og tulo ka mga basiyo sa bala sa kalibre .45 nga pistola.