Tungod sa ‘panag-ilog’ sa usa ka lalaki, nagbugno ang duha ka mga babaye sa Sityo Cainta, Barangay Pooc, Siyudad sa Talisay, alas 9:00 sa buntag, Martes, Hulyo 9, 2024,
Ang naasoy nga panagbugno sa duha ka mga babaye nakuhaan og video ug nag-viral sa social media dihang gi-post usa ka Melvin Alipio Creo sa samang adlaw.
Nasayran sa pakisusi sa Superbalita Cebu nga ang nalambigit sa away mao ang 43 anyos nga si ‘Marites’ nga taga Dumanjug, Sugbo ug usa ka 30 anyos nga si ‘Angelley’, taga Cainta sa Pooc, Talisay.
Ang lalaki nga nahimong sentro sa away mao si ‘Johnny’, 33, ulitawo, nakigpuyo kang Angeley sa naasoy nga dapit sa Talisay.
Ang ilang matuod nga mga ngan gipugngan ning mantlaan subay sa polisiya sa kapulisan.
Sa imbestigasyon sa kapulisan sa Talisay ubos sa kamandoan sa ilang hepe nga si P/Lt. Col. Epream Paguyod, nasayran sa Superbalita Cebu nga si Marites nagkapuyo usab kang Johnny.
Gikompirmar kini ni Johnny nga kanhi sila kapuyo ni Marites sa Dumanjug sulod sa lima ka tuig.
Samtang, si Johnny niangkon usab nga nagpuyo na sila karon ni Angelley sud sa dul-an napulo ka tuig sa Pooc, Talisay.
Matod ni Marites nga sa dihang wa na mouli si Johny sa Dumanjug, iyang gipangita hangtod nga natulltolan niya sa Pooc nga may laing kapuyo.
Matod ni Marites nga niadto siya sa maong dapit aron iyang kuhaon ang usa ka yawe, cellphone ug alahas.
Samtang si Angelley nagkanayon nga siya didto sa taas sa ilang balay sa pag-abot ni Marites, iya kining gikanaug ug giatubang.
Apan matod niya nga giataki siya pinaagi sa paglabnot sa iyang buhok ug gipaak ang tudlo nga niresulta sa pagka samad niini.
Dihang nauwang, ang duha pareho’ng nidangop sa Talisay Police Station nga may mga bun-on ug samad.
Si Marites nakabaton og mga kinawrasan sa iyang nawong, samtang si Angelly may samad sa iyang tudlo.
Apan ang duha gitambagan sa kapulisan nga mobalik sa barangay aron adto una husayon sa posibing pag-areglo sa duha ka habig ug mokuha og medical certificate nga gikinahanglan kon dunay mokiha ni bisan kinsa nila. / DVG