Usa ka 29-anyos nga lalaki ang naposasan sa mga sakop sa Tourist Police nga nadestino sa Cebu Safari and Adventure Park sa Barangay Corte sa lungsod sa Carmen, Sugbo, human nagdala og armas nga walay lisensya.
Ang suspetsado nakakuha’g atensyon sa Tourist Police nga sila si Staff Sergeant Valeriano Butal ug Police Patrolman Reden Otom sa kadudahan ang lihok niini atol sa pagsulod niya sa park.
Sa dihang giduol sa duha ka police nakita ang dala niini nga armas nga caliber 5.56 Frontier revolver nga dunay unom ka bala.
Sa dihang gipangutana kun aduna ba siyay lisensiya sa paghupot og pagdala sa armas, wala siya makapakita hinungdan nga giposasan ug giturnover sa Carmen Municipal Police Station alang sa pagpasaka og kaso sa paglapas sa Republic Act 10591 kun Comprehensive Firearms and Ammunition Regulation Act ug ang Comelec Gun Ban.
Si Police Brigadier General Redrico Maranan, hepe sa Police Regional Office 7, midayeg sa duha ka polis sa dali nga pagkasikop sa suspek.
“The safety of both local and foreign visitors remains a top priority for us in Central Visayas. This incident highlights the preparedness and professionalism of our Tourist Police in neutralizing risks within our tourist zones. We are committed to maintaining safe, secure, and welcoming destinations for all,” matud ni Maranan.
Iya usab nga gihimug-atan ang kamahinungdanon sa pagka-mabinantayon ilabi na ning panahon nga daghan ang turista nga mibisita sa Sugbo ug ubang bahin sa Central Visayas.
Nabantayan ni Maranan nga midagsa ang mga turista sa probinsya sa Sugbo ug sa mga silingan nga rehiyon tungod sa taas nga bakasyon sa miaging semana nunot sa pag-deklarar sa adlaw’ng Biyernes, Hunyo 6, 2025, nga regular holiday. / AYB