Nasakpan sa Mactan-Cebu International Airport (MCIA) Terminal 2 ang usa ka 26-anyos nga Filipino nga lalaki nga padulong unta sa Hong Kong nga nagdala og P1.149 milyunes sulod sa iyang bagahe nga wala madeklarar.
Ang pasahero residente sa Barangay Basak, Siyudad sa Sugbo.
Nangatarungan siya nga wala siya masayod sa regulasyon nga naglimita sa kuwarta nga mahimong ipagawas sa Pilipinas ngadto sa P500,000 lamang.
Nabalita sab nga nibalibad ang pasahero sa pagpirma sa resibo sa bagahe nga gipugngan.
Sumala sa opisyal nga Facebook page sa Philippine National Police Aviation Security Group (PNP-Avsegroup), nahitabo ang insidente niadtong Lunes, Hulyo 14, 2025, atol sa naandan nga security screening.
Nakita sa mga X-ray operator ang talagsaon nga mga hulagway sa bagahe sa pasahero nga sama sa binandol nga kuwarta.
Human sa hiniusa nga pag-verify sa Bureau of Customs (BOC) ug PNP-Avsegroup, gisakmit ang wala madeklarar nga kantidad nga P1,149,000.
Si PNP-Avsegroup Director Jason Capoy niingon nga kining insidente nagpakita sa pagkamabinantayon sa mga awtoridad sa pagmintinar sa luwas ug hapsay nga operasyon sa airport sa tanang panahon.
“This incident reflects the strong coordination and alertness of our security forces. [Avsegroup] remains committed to ensuring safe and secure airport operations at all times,” matod ni Capoy.
Ang gikompiskar nga kuwarta gitugyan sa buhatan sa BOC alang sa paghipos ug dugang imbestigasyon. / DPC