Nailhan na kadtong patay’ng lawas nga naglutaw sa kadagatan sa Bantayan, amihanang bahin sa Lalawigan sa Sugbo nga napalgan niadtong Martes, Agusto 6, nga usa ka mananagat nga gikatahong na-missing sukad sa Agusto 3, 2024.
Ang lawas sa usa ka lalaki nag-utaw-utaw sa kadagatn sa Marcos Shoal, Barangay Hilotongan, isla sa Bantayan nga gihulagway nga dugta na.
Apan nakadawat og tawag ang buhatan sa Municipal Disaster Risk Reduction Management Office sa Bantayan sa usa ka Eunese Brosas nagpa-ila nga asawa sa namatay, human nga nasayod nga aduay tawo’ng napalgan.
Giila ni Eunese nga iyang bana ang maong patay nga si Leo Brosas, 24, panagat ang panginabuhian nga taga-Victorias City, Negros Occidental.
Saysay ni Eunese niadtong Agosto 3 sa kadlawon mikuyog sa paglawig iyang bana sakay sa pumpboat aron nga managat sa Baliguian Island sa Iloilo City.
Apan gipahibawo nalang ang asawa nga missing si Leo sa dihang nahulog sa sakayan nga nakatulog niadtong higayona sa pangunahan sa pumpboat.
Pagkalumos maoy hinungdan sa kamatayon sa maong mananagat sigun sa municipal health officer nga si Dr. Samantha Tinsay. / DVG