GIHULAGWAY sa Police Regional Office (PRO)7 nga hapsay ug malinawon ang paglingkod sa mga bag-ong napili nga mga opisyal sa nagkalain-laing local government units sa tibuok Central Visayas sa Lunes sa udto, Hunyo 30, 2025.
Si Police Brigadier General Redrico Maranan, ang pangulo sa kapulisan sa rehiyon 7, nangunay sa pag-supervise sa security sa matag provincial capitol, mga lungsod ug siyudad nga sakop sa Central Visayas aron nga makab-ot ang malinawon ug hapsay nga paglingkod sa mga nanaog niadtong May 12, 2025 nga piniliay.
Matod ni Maranan nga wa siya maka-monitor nga dunay problema sa seguridad nga nagpasabot nga maayo ra pagkadala sa matag police official sa matag lungsod, siyudad ug probinsya ang ilang gihatag nga pagbantay.
“Wala namang security concern at mga untoward incidents na nai-report sa atin hanggang ngayon kaya ang ating assessment is very-very peaceful,” butyag ni Maranan.
Magpadayon ang paghatag sa security sa matag lokalidad sa kapulisan ug gimanduan ang matag City ug Provincial Police Office Directors lakip na sa mga station commanders sa kalungsoran ug siyudad nga mo-courtesy call sa mga bag-ong napili nga mga opisyal sa gobyerno.
Gisaad sa PRO-7 nga ang PNP andam sa pakig-alayon sa maong mga LGU officials alang sa malungtaron ngaa kaayohan sa matag lokalidad. / AYB