Usa ka lalaki ang nagmaoy ug naghubo sa tunga sa karsada sa Salinas Drive, Dakbayan sa Sugbo, sa pasado alas 4:00 sa kaadlawon, Hulyo 23, 2025.
Dali kining girespondehan sa mga tanod sa Barangay Lahug human makadawat og alarma bahin sa usa ka lalaking nakagubot sa maong dapit.
Naabtan sa mga tanod ang lalaki nga nagligid-ligid ug nagyawyaw sa dalan nga wala nay sapot, hinungdan sa kasamok sa lugar.
Giila ang lalaki nga si alyas “Joey,” 25-anyos, lumulupyo sa Kinasang-an Pardo apan kasamtangan nga naglatagaw sa Lahug ug Apas tungod kay giingong wala na kini mga kabanay.
Matod sa mga tanod nga base sa unang mga nakasaksi, kalit lang nagmaoy si Joey human wala mahatag ang iyang gipangayo nga P90 pesos nga kuwarta ug pagkaon.
Gisulayan pa niini ang pagpangatang sa mga sakyanan nga mangagi, buot magpaligis ug tapuson ang iyang kinabuhi.
Sa interview kang Joey, iyang gitug-an nga birthday niya niadtong Hulyo 23, 2025, ug nangayo unta siya og kuwarta aron makapalit og pagkaon.
Giingong nakadungog siya og dili maayong estorya gikan sa mga tawo nga nakakita kaniya ug maoy naka-trigger sa iyang depresyon, hinungdan nga nakahimo’g kasamok sa lugar.
Gibutyag sab ni Joey nga gikan na siya sa rehabilitation center ug orphanage apan nakaikyas tungod kay dili siya makaagwanta ug mas gipili na lang niya nga mahimong libud-suroy.
Aron makalma si Joey, usa sa mga tanod ang nitunol kaniya og P100.
Tungod niini, nipadaplin si Joey ug naminaw sa tambag sa mga awtoridad ug nahuwasan ra sab siya.
Sa pagkutlo niining balita, gikuha na si Joey sa usa niya ka higala ug gitagaan na og mga sapot, sanglit dili man siya magpa-turn over sa kon asa siya nagpuyo nga mao untay unang plano sa mga awtoridad. / JDG