Nalandig sa tambalanan ang usa ka lalaking nagmotorsiko sa dihang gipusil sa riding in tandem ala 1:45 sa kaadlawon, Pebrero 19, 2025, sa Buhisan Road, Barangay Buhisan, Siyudad sa Sugbo.
Ang biktima giila nga si Charlito Baculi Pumar, 28, ulitawo , taga Sityo Olivo, Barangay Buhisan, samtang ang iyang angkas nga si Tenshi Taburada, 24, ulitawo, wala hinuon maigo.
Ang imbestigasyon sa Guadalupe Police Station 9, nabutyag nga ang biktima ug ang angkas niagi sa maong dapit ug sa dihang nihunong, dunay lain nga nagmotorsiklo ang kalit nitunga ug namusil.
Gipusil katulo kahigayon ang biktima, dayon nisibat ang riding in tandem.
Nakapangayo sila og tabang sa habalhabal driver nga niagi ug gidala sila sa Barangay Hall sa Buhisan.
Ang biktima gitabang sa Buhisan Action Team ug gidala sa Cebu City Medical Center.
Ang PNP Cebu City SOCO Team naka-recover sa crime scene og duha ka kabhang sa wala pa matino nga kalibre sa armas. Padayon ang imbestigasyon sa kapulisan sa Guadalupe aron mailhan ang mga namusil ug ang ilang motibo. / DVG