Patay na nga nidangat sa Minglanilla District Hospital ang usa ka lalaki human maligsi sa dump truck sa national highway sa Barangay Inayagan, siyudad sa Naga, alas 5 sa hapon sa Huwebes, Pebrero 15, 2024.
Ang biktima nga nagmaneho sa motorsiklo giila nga si Mark Anthony B. Depio, 25, taga Barangay Colon, Naga.
Samtang, ang Howo dump truck nga nakaligis sa biktima gimaneho ni Jeffie Mission, 36, taga Brgy. Manlapay, lungsod sa Dumanjug.
Sa pasiunang imbestigasyon sa kapulisan sa Naga ubos sa kamandoan ni Police Lt. Col. William Humoc, nasuta nga ang duha ka mga sakyanan pareho og direksiyon, padung sa habagatan.
Matod pa, ang biktima niagi sa outer lane samtang dump truck naa sa inner lane apan pag-abot sa maong dapit, ang duha nagkasingkiay.
Ang biktima nalagpot ug nabangil sa ulahing ligid sa dump truck. Ang biktima gitabang sa mga rescuer ug gidala sa Minglanilla District Hospital apan gideklarar nga dead on arrive (DOA).
Ang drayber sa Howo dump truck naa sa kustodiya sa Naga Police Station ug gitakatakda nga pasakaan og kasong reckless imprudence resulting in homicide.