Nagmotorsiklo nabangga sa dump truck, namatay

SunStar Liloan
SunStar Liloan

LALAKI nga nagmaneho sa iyang motorsiklo namatay human nabanggaan sa gikasugat nga dump truck sa national highway sa Barangay Poblacion, lungsod sa Liloan, alas 7 sa buntag sa Miyerkulis, Hunyo 19, 2034.

Si Fel Rydge, 20, taga Purok Kaimito, Poblacion, Liloan nagmaneho sa iyang Sporty Mio, gideklarar nga patay nang niabot sa usa ka tambalanan sa Dakbayan sa Danao.

Gitanggong ang drayber sa dump truck nga si Ariel Caramihan, 27, taga Baranay Vito, lungsod sa Minglanilla.

Si Major Eric Gingoyon, hepe sa Liloan Police Station nga nahinabi sa Superbalita Cebu, nagkanayon ang biktima nakainom atol sa insedente.

Base sa gibutyag sa mga saksi, dason ni Gingoyon, kusog kaayo nga nakapadagan sa motorsiklo si Rydge.

Ni-counterflow siya sa pikas lane hinungdan sa pagkabangga sa gikasugat nga dump truck.

Ang dump truck dunay kargang aspalto paingon sa Dakbayan sa Sugbo.

Sumala ni Gingoyon nga initial nilang nakuha nagkasabot sila si Caramihan ug pamilya sa biktima alang sa amicable settlement.

Sa pagkakaron, gitanggong una sa kapulisan ang drayber sa dump truck samtang wala pay pormal nga final nga kasabutan.

Samtang, dili kini unang higayon nga ang usa ka motorsiklo nabanggaan og dakong sakyanan hinungdan sa subling pagpahinumdom sa kapulisan nga kanunay moobserbar sa defensive driving.

Labaw nga dili momaneho og sakyanan ko makainom og ilimnong makahubog kay risgo kini sa aksidente. (GPL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph