Nakabangga ang ambulansya nga nagdala og pasyente paingon sa Perpetual Succour Hospital sa usa ka motorsiklo sa intersection sa dalan P. Del Rosario ug Junquera sa Barangay Kamagayan, Cebu City ala 1:40 sa kadlawon, Martes, Agusto 5, 2025.
Sa imbestigasyon sa Traffic Enforcement Unit sa Cebu City Police Office (CCPO), base sa kuha sa CCTV camera sa Cebu City Eagle Eye nga nagsubay sa P. Del Rosario ang ambulansya nga gimaneho ni Israel Jerusalem, 34, taga Purok 9, Palanas, Lungsod sa Alcantara, Sugbo.
Pag-abot sa maong dapit bisan naka-red ang traffic light nilahos gihapon ni samtang ang motorsiklo nga gimaneho ni Andrew Abesia, nagsubay sa dalan Junquera paingon sa dalan Colon naka-green light signal nga maoy hinungdan nga nag-abot sila sa tunga.
Tungod sa kakusog sa impact nadaro sa ambulansya ang motorsiklo nga gimaneho ni Abesia sa gibanabana 43 metros.
Gumikan niini, nakaangkon og mga kadaot sa lawas si Abesia nga gitabang sa Miller Hospital.
Matod sa TEU nga bisan nagwangwang ang ambulansya samtang naghatod og pasahero wala kini magpasabot nga dili na mag-amping kon molabang sa mga intersection nga maoy hinungdan sa pagkadisgrasya.
Kasamtangan nga gikustodiya sa TEU sa CCPO ang driver sa ambulansya nga si Jerusalem ug giandaman na og kasong Reckless Imprudence Resulting in Serious Physical Injury and Damage to Property. /