Usa ka lalaki nga nagmaneho og motorsiklo naangol human nadasmagan sa usa ka government service vehicle sa Brgy. Punta Engaño, siyudad sa Lapu-Lapu sa national highway sa Poblacion, Sibonga, habagatang Sugbo alas 12 sa udto sa Biyernes, Pebrero 9, 2024.
Ang biktima giilang si Roy Camporedondo Garces, hamtong, taga lungsod sa Liloan, amihanang Sugbo. Samtang, ang sakyanan sa kagamhanan gimaneho ni Domingo Mendoza Olis, 71, minyo, taga Buot, Punta Engaño, Lapu-Lapu City.
Basi sa imbestigasyon sa kapulisan sa Sibonga ubos sa kamandoan sa ilang hepe nga si Police Capt. Fort Antony Valdez, si Olis nagmaniho sa Toyota coaster gikan sa Marian Monks Monastery sa Brgy. Lindogon, sa maong lungsod.
Ang mga sakay padung na mopauli sa Punta Engaño apan nihapit sa merkado.
Apan, dugang sa kapulisan, nikalit kini sa pagliko sa wala hinungdan nga ang nagmotorsiklo nga si Garces nga gikan sa Liloan padung sa Samboan nidasmag sa wa’ng bahin sa atubangan sa Toyota Coaster hinungdan sa pagkahagba sa biktima sa karsada.
Gitabang siya ni Cebu 2nd District Provincial Board Member Stanley Caminero, usa ka doktor, nga tayming nga niagi hinungdan nga nahatagan og first aid.
Ang biktima nakaangkon og samad sa iyang walang bahin sa nawong.
Ang biktima gidala sa Carcar District Hospital.
Hinuon, nakab ot ang amicable settlement sa duha ka mga habig sa aksidente hinungdan nga way kaso nga masang-at.