Patay ang usa ka 53 anyos nga lalaki nga nagmaneho og motorsiklo human nakasugat og aksidente sa M.L. Quezon highway, atubangan sa usa ka department store sa Barangay Pajo, Dakbayan sa Lapu-Lapu, alas 9:36 sa buntag sa Sabado, Agusto 3, 2024.
Ang biktima taga Purok Ilang-Ilang, Barangay Opao, dakbayan sa Mandaue.
Samtang ang gikaengkuwentro sa biktima mao ang usa ka public utility vehicle (PUV) nga namasahero nga gimaneho sa 38 anyos nga ulitawo, taga Sityo Casanta, Barangay Mactan, Lapu-Lapu City.
Ikaduhang sakyanan nga nalambigit mao ang Toyota Innova nga giabangan sa 31-anyos nga lalaki nga taga Purok 4, Barangay San Miguel, Lungsod sa Cordova.
Base sa imbestigasyon sa Traffic Enforcement Unit nga human ni-pick up ug nipakanaug og pasahero sa maong dapit ang PUV, mipadagan dayon kini subay sa lane.
Giingong wa mo-signal ang PUV sa dihang nagdagan nga naggikan sa outer lane paingon sa tunga sa dan hinungdan nga nadusmo ang biktima ug nalagpot sa sementado nga dalan.
Naligsan ang biktima sa laing sakyanan nga nagsunod niadtong higayona nga wa gilayon kabantay ang driver.
Ang biktima gidali sa pagdala sa Lapu-Lapu District Hospital apan gideklarar nga dead-on-arrival.
Samtang ang drayber sa PUV ug Toyota Innova gikustodiya sa kapulisan sa Dakbayan sa Lapu-Lapu. / DVG