Babaye’ng kustomer nga nagpa cash-in pinaagi sa mobile payment app ngadto sa usa ka tindahan nga mobalor og P5,000 gipadakop kay wa diay kuwarta nga ikabayad.
Nahitabo kini alas 12:15 sa Lunes sa udto, Hunyo 24, 2024 sa Sitio Avalle, Barangay T. Padilla, Dakbayan sa Sugbo.
Ang suspek gitago sa ngala’ng Almalyn, 41, residente sa Sitio Eagles, Barangay T. Padilla.
Matod ni Police Major Marvin Fegarido, hepe sa Parian Police Station, nga nakig-transact si Almalyn sa biktima nga giila lang sa ngala’ng Nante, 44, tag-iya sa tindahan nga nahimutang duol sa merkado sa T. Padilla nga magpa cash-in sa GCash og P5,000.
Nisalig ra sab ang tag-iya tungod kay silingan ra ang kustomer hinungdan nga nihimo gilayon sa transaksiyon nga wa una maningil sa bayad.
Sa dihang na-send na ang P5,000 ni Nante ngadto sa mobile number nga gihatag ni Almalyn diin gipadala ang kantidad, naningil siya sa bayad.
Apan wa diay ikabayad si Almalyn, busa nanawag gilayon ang biktima og pulis aron ipadakop ang suspek.
NA-SCAM DIAY
Pangatarungan ni Almalyn nga nadani siya sa pagpa cash-in human siya nakadawat og tawag nga nagpahibawo kaniya nga nakadaug siya og raffle sa kantidad nga P10,000.
Ang maong caller nipasalig nga motabang aron nga ma-claim ang daog nga kuwarta.
Makuha niya ang iyang daog nga P10,000 kon maka deposit og P5,000.
Sumala pa sa suspek nga mora siya og na-hypnotize tungod kay wala gyud siya makabalibad.
Sa tinguha nga ma-claim ang daog, nangita siya og tindahan nga adunay maka cash-in ug matod niya nga uwahi na siyang nakaamgo nga ilad ra diay ang tanan.
“First time pa gyud to nako, P10,000 daw akong daog nya kinahanglan nako pa cash-in og P5,000 ang katong number nga giingon sa akoa. Gitawagan nako tong number ba kay ipabalik nako ang kuwarta, wala naman gyud makontak, Sir,” matod ni Almalyn.
Gibutyag hinuon ni Fegarido nga wala pay record sa ilang police station ang suspek apan wala pa sila masayod sa ubang mga unit sa kapulisan ug ilang gipaubos sa background investigation.
Ang pamahayag sa suspek, matod ni Fegarido, labot sa giingong nanawag niya wala ni makapakita og ebidensya.
PAHIMANGNO
“Manawagan lang ta sa komunidad no nga dili gyud ta magpada dayon sa mga pasalig nga nakadaug ta. Dili ta mag expect nga nakadaug ta kon wala tay giapilan nga mga raffle.
Ako gipangutana siya kon niapil ba siya’g raffle, ana siya wala,” matod ni Fegarido.
Kasong swindling ang atubangon sa suspek apan nihangyo siya sa biktima nga iya kining bayran, dungan sa pagmahay nganong nadala siya sa pasalig sa tawo nga wala siya kaila. / AYB