Atong suroyon ang lungsod sa habagatang bahin sa Lalawigan sa Sugbo nga puno sa mga tinipigang bahandi nga gasa sa kahitas-an - Boljoon.
Ang maong lungsod adunay dakong pangpang nga naglikoslikos sa di pa nimo makita ang kaanyag nga talan-awon nga mao ang simbahan nga gitukod niadtong panahon sa mga Katsila.
KASAYSAYAN
Ang Boljoon unang napatik sa kasaysayan niadtong tuig 1606, diin usa sa duha ka mga simbahan gitukod sa mga Agustino, apan nahimugso na ang Boljoon sa tuig 1599, diin usa siya sa walo ka Visita (Chapel) sa Sialo nga karon mao na ang Barangay Valladolid, Carcar City, Cebu.
Sulod sa 100 ka katuigan nahimo siyang kapilya ngadto sa Carcar apan tungod sa ka layo sa Carcar, nibuwag ang Boljoon ug nahimong usa ka lungsod niadtong tuig 1606.
Apan nagpadayon gihapon ang kaparian nga nadestino sa Carcar sa pagmisa sa maong lungsod hangtod na abot ang labing unang kura paruko tuig 1692.
Sa nanglabay nga katuigan, ang lungsod adunay giatubang nga dakong kaaway, ang mga pirata o slave raiders diin ilang sikupon ang kutob sa ilang makita aron himuong katabang o ibaligya sa laing nasod.
Apan natapos ang kalbaryo sa dihang nakig-away ang mga Boljoanon batok sa mga pirata nga nahitabo sa Isla sa Sumilon niadtong 1813, diin ilang napatay ang pangulo sa mga pirata.
Niadtong Oktubre 31 gisaulog ang ika-417 nga founding anniversary sa lungsod timaan sa maanindot nga kasaysayan.
SUROYANAN
Usa sa mga gidalit nga turismo sa lungsod mao ang Heritage Walk sulod sa vicinity sa simbahan.
Ang Heritage Walk nga nahimutang sa Poblacion diin imo’ng makita ang nagkalainlaing estruktura sa karaang mga balay nga napreserbar pa hangtod karon.
Dili lang ang karaang simbahan imong masuroyan sa maong lungsod, aduna sad silay lainglaing mga gidalit alang sa mga turista nga lokal o langyaw.
Lakip na niini ang Dayhag Falls, Ablayan Peak, Ili Rock, Heritage Ancestral Houses, ug Baño sa Poblacion (karaang tubod sa lungsod). Aduna say mountain ug beach resorts maong dili gyud ka maglisod sa pagsuroy kay adunay daghang kapilian nga balay kapahulayan.
Aduna say Kasikas (food stalls) nga anaa nahimutang likod nga bahin sa munisipyo.
Ayaw sipyata ang pagtilaw sa lamiang delicacies sa Boljoon – ang torta ug cookies nga nahimutang ilalom sa kumbento ug didto pud nimo makit-an ang Boljoon Parish Museum nga puno sa mga artifact gikan pa sa panahon sa Pre-Colonial.