Patay ang 28-anyos nga lalaki human pusila sa makadaghang higayon sa wala mailhing mamumuno niadtong Huwebes sa gabii, Agusto 20, 2026, sa Barangay Greenhills, Lungsod sa San Fernando, Probinsiya sa Sugbo.
Ang biktima giila sa kapulisan nga si Vincent Repaso Romo, molupyo sa Barangay Sangat sa maong lungsod.
Subay sa imbestigasyon sa San Fernando Municipal Police Station, nagmaneho sa iyang motorsiklo ang biktima sa dihang gipahunong ug nikanaog sa maong dapit alas 11:30 sa gabii.
Pipila ra ka gutlo ang nakalabay, kalit lang niduol ang wala mailhing suspek ug gipusil ang biktima sa makadaghang higayon.
Nisibat sa wala matino nga direksyon ang mamumuno.
Ilegal nga drugas ang usa sa gitan-aw nga motibo sa kapulisan sa maong krimen.
Matod sa mga saksi sa dapit, nadungog nila ang pagpakiluoy sa biktima sa wala pa gipusil diin nakasinggit pa kini nga dili siya ang "nakadispalko" sa kuwarta.
Nagtuo ang mga imbestigador sa kapulisan nga dunay kalabutan sa utang o remit sa drugas ang krimen.
Padayong gipalawman sa San Fernando Municipal Police Station ang ilang imbestigasyon, ilabi na ang pagsusi sa background sa biktima aron mailhan ug madakpan ang nagpaluyo sa maong pagpamusil. / AYB
