Gidakop ang tigbantay sa manukan human nagpakita sa iyang armas samtang nagtagay alas 10:49 sa gabii, Biyernes, Agusto 15, 2025 sa Barangay Luyang, lungsod sa Carmen, Probinsiya sa Sugbo.
Si Julian Marzon Lingo, 37, ulitawo, lumad nga taga lungsod sa President Carlos P. Garcia, Probinsiya sa Bohol, apan kasamtangang nagpuyo sa lungsod sa Carmen, gitanggong sa Carmen Police Station samtang gi-andam ang kasong kalapasan Illegal Possession of Firearm batok kaniya.
Matud ni Police Captain Jessie Tañola, hepe sa Carmen Police Station, nga nakadawat silag tawag gikan sa 911 emergency hotline nga dunay tawo nga nagtagay nga nagpakita sa iyang armas.
Daling miresponde ang kapulisan ug wala maabti og 5 minutos, nasignit ang suspek sa akto.
Nakuha sa possession niini ang usa ka Colt MK-IV caliber. 45 pistol nga adunay pito ka buhing bala.
Matud ni Captain Tañola, nga tigbantay sa manokan ug ubang kahayopan ang suspek.
"Ang armas iyang giingon nga proteksyon niya sa mga kawatan! Kay naa daw siya na monitor 2 days na nga naghapa hapa sa ilang mga hiniktan,” matud ni Tañola. / GPL