Ang mga otoridad sa dakbayan sa Mandaue nipahinumdom ngadto sa mga lungsuranon niini nga tumanon ang ilang responsibilidad, ilabi na sa pagsunod sa mga balaod sa kinaiyahan sa dakbayan.
Kini tungod kay ang Siyudad nanakop ug nipahamtang og multa ngadto sa 700 ka indibidwal nga nakalapas sa environmental laws subay sa ilang kampanya sa pagpalig-on sa pagpatuman sa environmental laws sa 2023.
Si Araceli Barlam, hepe sa Mandaue City Environment and Natural Resources Office (MCENRO), nipahibalo sa Martes, Pebrero 13, 2024, nga adunay daghang nadakpan gikan sa Marso hangtod sa Disyembre 2023.
Kini nga mga pagpanakop resulta sa kampanya sa pagpatuman sa higpit sa mga balaod sa kinaiyahan sa dakbayan sa Mandaue.
Ang kampanya gipasiugdahan ni Mandaue Mayor Jonas Cortes, kinsa nisugyot nga ang kapulisan kinahanglang magpahigayon og inadlaw-adlaw nga pagpatrolya aron masiguro nga ang mga lungsuranon dili lang mosunod sa mga lagda sa Dakbayan kon dili mosunod usab sa mga regulasyon sa kinaiyahan niini. Ang kapulisan nakadawat og training alang niini nga kampanya niadtong Pebrero 2023.