Butobuto sa armas ang milanog sa usa ka gasoline station sa Barangay Balabagon, Lungsod sa Moalboal, Sugbo sa dihang gipusil ang kustomer nga nagpatubil.
Ang pagpamusil nahitabo Lunes sa hapon, Agusto 26, 2024 sa Seaoil gas station.
Ang biktima giila sa mga saksi nga si John John Aventurado, 29, drayber og habalhabal ug taga Barangay Tigbao, Lungsod sa Badian. Nasuta nga armado usab kini.
Samtang napagan sa maong hitabo ang usa ka Roland, 32, taga Balabagon, lungsod sa Moalboal.
Base sa inpormasyon nga nahipos sa kapulisan nga nagpatubil og gasolina sa iyang gimaneho nga motorsiklo si John John ug may laing motorsiko ang miabot.
Ang gasoline attendant nagtuo nga laing kustomer nga magpagasolina apan namusil ang maong armadong lalaki tumong sa biktima.
Gikataho nga sulod sa siyam ka higayon gitirahan si Aventurado sa nagkadaiyang bahin sa iyang lawas resulta sa iyang kamatayon.
Samtang laing biktima nga si Roland ang napagan sa dihang natapsingan sa bala sa iyang tiyan.
Nagpadayon pa sa pagsubay ang kapulisan sa Moalboal aron sa pag-ila sa suspek ingon man ang pagsuta sa motibo sa maong krimen.
Wa pa matino sa kapulisan bahinb sa motibo sa krimen, apan ang maong dapit giila nga hotshop sa drugas./ DVG