Wa na matabang pa sa mga medic ang drayber sa motorsiklo human malatayi sa dump truck sa highway sa Barangay Calajoan, Lungsod sa Minglanilla, niadtong pasado alas 4:00 sa hapon, Biyernes, Agusto 8, 2025.
Ang biktima nailhan nga si Rowel G. Elguero, 50, residente sa Barangay Poblacion, Lungsod sa Barili nga nagmaneho og motorsiklo.
Base sa imbestigasyon sa Traffic Unit sa Minglanilla Police Station, ang duha ka dagkong trak ingon man ang motorsiklo nga gisakyan sa biktima ang pulos padung sa habagatang bahin sa Sugbo.
Gikataho nga ang dump truck nga gimaneho ni Orlando Rian Jr., 48, nagsubay sa inner lane, samtang ang trailer truck nga gidrayban ni Joel Lawas, 49, nitadlas sa outer lane.
Giingong ang motorsiklo nisuksok sa tunga sa duha ka nagdagan nga trak ug nasabod ang wala nga ligid sa trak nga gimaneho ni Lawas.
Nawad-an sa balanse si Elguero hinungdan nga natumba ug nalatayan sa tuo nga ligid sa dump truck nga gimaneho ni Rian hinungdan nga nalatayan kini ug nakabsan sa iyang kinabuhi.
Wa na ma-revive ang kinabuhi ni Elguero taliwala sa mga paningkamot sa medical team nga nirespondi gumikan sa grabeng kadaot sa lawas nga iyang naangkon human nalatayan sa mga dagkong ligid sa trak de karga.
Ang duha ka drayber sa trak kasamtangang gitanggong sa Minglanilla Police Station ug posible nga mag-atubang og kasong reckless imprudence resulting to homicide ug damage to property.
Tambag sa kapulisan ngadto sa mga drayber nga kanunay nga magmatngon aron malikayan ang disgrasya nga mokutlo sa kinabuhi.
Gipaabot sa kapulisan ang desisyon sa kabanay sa namatay. / dugang taho gikan ni GPL