Nagpatuo’ng kabanay, mihilak pa sa haya; ‘mangawat’ diay

SunStar Cebu City
SunStar Cebu City

Lalaki nga nagpatuo nga kabanay sa namatay nga gihaya sa St. Francis Funeral Parlor sa Dalan Natalio Bacalso, Siyudad sa Sugbo sa alas 9 sa Huwebes sa gabii, Hunyo 20, 2024, gipadakop human nangawat og cellphone sa tinuod nga pag-umangkon sa namatay.

Gisundog ang apelyedo nga nakasuwat sa Facebook, nihilak pa sa haya.

Ang suspek giila sa alyas nga James, 29, taga Brgy. Guadalupe, Dakbayan sa Sugbo.

Matod sa gwardya sa punerarya nga nagpatuo nga pag-umang­kon sa namatay ang suspek.

Gani niduyog pa kini sa kasub-anan sa kabanay nga naa sa gawas sa punerarya.

Nisuwat, matod pa, kini sa log book sa punerarya ug gisunod niya ang apilyedo sa iyang gisundan nga nagpalista.

Nagtuo ang pamilya nga tinu­od nga ilang paryente ang suspek kay naghilakhilak pa sa atubangan sa lungon sa namatay.

Human sa serbisyo sa patay, nikaon pa kini sa painit sama sa Milo ug biskwit nga giandam sa pamilya, apan gikuha niini ang cellphone nga gi-charge nga gipanag-iya sa apo sa namatay.

“Nagkutaw siya’g Milo. Nangukay siya’g mga biskwit kay dili siya mokaon atong mga baratuhon nga biskwit. Pagkahuman, niadto siyag CR pero pagbalik niya gikan sa CR, didto gihapon siya mibalik sa dapit nga naay cellphone nga naka charge...Pag lakaw na nitindog siya, iyang gikuha ang cellphone pero nakabantay man tong usa, nisinggit dayon nga gikuha ang cellphone,” matod sa gwardya.

Human mabulabog, ang suspek kalit nga nidagan pagawas ug gitabangan siya og gukod hangtod nga nagunitan sa laing gwardya sa punerarya.

Tungod sa maong insidente, gitabangan siya sa pagkulata sa mga tawo nga naglagot.

Nanawag dayon sila og polis sa Sawang Calero Police Station aron i-turnover ang suspek.

Giangkon sa gwardya nga kanunay na nga magbalik-balik sa St. Francis si James.

Gani daghan na ang nabiktima nga mga kabanay sa gipanghaya sa maong punerarya.

Si Police Captain Jay-r Palcon, hepe sa Sawang Calero Police Station, nagkanayon nga gibuhian ra nila ang suspek tungod kay dili na mopasaka og kaso ang kabanay sa gikawatan niini. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph