Nagpatuo nga dunay connection sa Bureau of Internal Revenue (BIR) sa dakbayan sa Mandaue nga giingong mangayo’g kwarta niadtong moproseso sa ilang mga papeles sa maong ahensya gi-entrap sa Criminal Investigation and Detection Group Cebu City Field Unit alas 11 sa Martes sa buntag, Pebrero 13, 2024 sa City Square, Barangay Subangdaku, Mandaue City.
Ang suspek giila nga si Amancia Pulvera Loreto, 53, biyuda, taga Purok Miracle Fruit, Barangay Yati, lungsod sa Liloan, amihanang Sugbo.
Unang nidangop sa buhatan sa CIDG 7 si Cindy Dico Bering, 51, taga Purok Thunder Timpolok, Barangay Babag, dakbayan sa Lapu-Lapu aron ireklamo si Loreto.
Giingon nga nipasalig si Loreto nga mahatag na ang iyang mga papeles gikan sa BIR human siya nakabayad niini og P50,000 niadtong Agusto 2023.
Apan giingong nangayo na usab kini og dugang bayad nga P100,000 aron mahatag na dayon ang iyang mga papeles.
Dinhi na siya nireklamo sa kapulisan tungod sa kadako sa gidemanda sa suspek.
Giplano dayon sa mga sakop sa CIDG Cebu City Field Unit inabagan sa Subangdaku Police Station sa Mandaue City Police Office (MCPO) ang entrapment operation.
Nag-andam ang CIDG og duha ka tag P500 nga gihimo’ng budol money nga maoy itunol nila sa suspek.
Sa dihang nisanong ang suspek nga sila magkita sa mall sa Subangdaku ug kuhaon na niya ang iyang gipangayo nga kantidad, ning-position dayon ang mga polis sa pagpangulo ni Police Lieutenant Colonel Randy Korret.
Atol sa pagtunol sa reklamante sa envelope nga naa ang boodle money, gidakop dayon si Loreto.
Nakuha sa kapulisan ang usa ka envelope nga gisudlan sa boodle money, lakip na ang duha ka cellular phones niini.
Kasong estafa ang giandam nga kaso sa CIDG batok sa suspek nga kasamtangan nga gibalhog sa custodial facility sa maong buhatan.