Wala molampos sa iyang modus ang 33-anyos nga babaye nga nagpakaaron–ingnon'g secretary sa usa ka abogado nga motabang sa pag-process sa legal documents bugti sa pagpaningil og bayad.
Ang suspek nadakpan sa gilusad nga entrapment sa mga sakop sa Mambaling Police Station sa alas 11:20 sa buntag, Martes, Hulyo 29, sulod sa dakong mall nga nahimutang sa Barangay Mambaling, Cebu City.
Ang maong subject gitago sa alyas nga Queenie, minyo, residente sa Barangay Nocnocan, Lungsod sa Talibon, Bohol.
Base sa imbestigasyon sa kapulisan, biktimahon unta ni Queenie ang usa ka sakop sa Philippine Coast Guard (PCG) kinsa nidangop sa police station alang sa police assistance sa dihang iyang nadiskubrehan ang pangilad ray tuyo sa suspek.
Meet-up
Gikatakda ang panagtagbo sa suspek ngadto sa biktima aron kolektahon ang pasiunang bayad niini sa gipaproseso nga “No Show Annulment” nga adunay bayranan nga moabot sa P100,000.
Sa maong panagtagbo, andam na untang mohatag og downpayment ang sakop sa PCG apan gisiguro sa biktima nga lehitimo ang transaksiyon, hinungdan nga iyang gitawagan ang law firm diin giingong secretary si Queenie sa usa sa mga abogado nga mo-handle sa kaso.
Nasuta nga way nakaila ni Queenie ug gihimakak sa law firm nga konektado siya sa maong buhatan.
Entrapment
Nipahigayon og entrapment ang Mambaling Police Station ubos sa pagdumala ni Police Captain Wilmer Castillo diin nagsabot ang duruha nga mag-abot sa usa ka dakong mall sa Barangay Mambaling.
Nadakpan si Queenie human sa transaksiyon tali sa biktima ug kasong Estafa and Usurpation of Authority ang atubangon sa dinakpan. (JDG)