Pulos nabalhog sa prisuhan sa Carbon Police Station ang tulo ka lalaki ug usa ka babaye human nagrambol tungod lang kay nag-ilog kon si kinsa ang makatag-iya sa kasing-kasing sa 54 anyos nga babaye nga kauban nila sa tagay.
Nahitabo ang rambol alas 9:05 sa gabii, Lunes, Mayo 5, 2025, sa Sitio Pig Vendor, Barangay Ermita sa Dakbayan sa Sugbo ug usa kanila ang nakuhaan og armas sa pag-abot sa mga polis.
Ang mga napriso giila sa alys nga Bradix, 27, taga Sitio Lutaw-lutaw, Barangay Sto Niño, Rex, 37, taga Sitio Ermita Proper, Barangay Ermita, Jamal, 24, residente sa Leon Kilat, Barangay Pahina Central ug si alyas Lanie, 54, dalaga nga taga Sitio Kawit, Barangay Ermita, pulos sa Dakbayan sa Sugbo.
Nakadawat og tawag sa telepono ang Carbon Police Station nga nagpahibalo nga adunay nagrambol sa Sitio Pig Vendor.
Dali nga niresponde ang mga polis ug ila nga naabtan ang tulo ka suspek nga nagsinumbagay samtang niuwang si alyas Lanie.
Gumikan sa namugna nga kagubot gipangdakop ang tulo lakip na si Lanie ug sa dihang gipangrekisa, nakuhaan si Bradix og usa ka .38 nga revolver nga adunay duha ka bala.
Matod ni Bradix sa dihang nahinabi sa Superbalita Cebu nga ang hinungdan sa ilang panag-away gumikan sa selos o pangigi kay silang tulo pulos nakagusto kang alyas Lanie.
Giangkon niya nga nakat-on siya sa paghigugma ni Lanie kay kanunay kini nga makig-uban nila og inom ug buotan sab ni apan wala siya magtuo nga silang Rex ug Jamal nagtinguha sab nga makauyab sa babaye.
Sa dihang nangahubog na silang tulo dinhi na nagsugod ang ilang panaglalis.
“Naibog man gud mi ana niya, sa akoa lang gusto nako siya minyoan gyud pero nasuko man tong kauban namo nga ingon niya nga sila daw ang uyab mao to nagsumbagay mi kay gusto man nako nga ilugon,” matod ni Bradix.
Nagdumili sa paghatag sa iyang komento si Lanie sa dihang gisuwayan og interview.
Mag-atubang ang upat og kasong alarm and scandal ug laing kaso sab ang ipasaka kang Bradix nga kalapasan sa Republic Act 10591 o illegal possession of firearms ug Comelec Gun Ban. / AYB