Nagrambol tungod sa babaye

GUBOT: Grupo sa mga batan­on ang nalambigit sa kagubot sa Barangay Poblacion, lungsod sa Liloan, Dominggo sa kaadlawon, Hunyo 16, 2024 diin nag-viral usab kini sa Facebook page sa “Taga Liloan Ka Kung?”. / Screenshot gikan sa Taga Liloan Ka Kung? Facebook page
GUBOT: Grupo sa mga batan­on ang nalambigit sa kagubot sa Barangay Poblacion, lungsod sa Liloan, Dominggo sa kaadlawon, Hunyo 16, 2024 diin nag-viral usab kini sa Facebook page sa “Taga Liloan Ka Kung?”. / Screenshot gikan sa Taga Liloan Ka Kung? Facebook page

Laing rambol sa mga batan­-on ang nahitabo sa lungsod sa Liloan sa Dominggo sa kaadlawon, Hunyo 16, 2024.

Sa usa ka Facebook page nga mao ang “Taga Liloan Ka Kung?” makita ang paglinabayay ug dunay usa ka lalaki ang gitabangan usab sa pagsumbag samtang ang motorsiklo sa laing batan-on ang natumba.

Matod pa, kini nahitabo duol sa Municipal Hall sa Barangay Poblacion sa Liloan ug wala mangahadlok bisan sa pagbadlong sa mga tawo nga nangagi.

Si Police Major Eric Gingo­yon, hepe sa Liloan Police Station, nagkanayon nga wala pay midangop sa ilang police station aron magpa-blotter.

Mao kini hinungdan nga wala pa matino atol ning pagsuwat kon dunay nasamdan sa ma­ong karambola sa mga batan-on.

Matod niya, iya nang gimandoan ang iyang mga imbestigador nga susihon kon kinsa kining maong mga batan-on ug unsay ilang giawayan sa grupo.

Subay niini, usa sa mga nag­rambol nga usa ka menor ang nakuha na pagka Dominggo sa hapon, Hunyo 16, 2024, ug duna na kini gibutyag nga mga pangalan nga sa pagkakaron tulo pa ang gihatag sa mga imbestigador.

Sigon sa maong batan-on nga naa sa kustodiya sa Liloan Police Station nga away sa babaye ang hinungdan.

Gikan matod pa ang maong duha ka grupo sa usa ka imnanan apan ang laing grupo mibalhin sa laing imnanan sa dihang ang pikas grupo magpasingit na matod pa sa estorya.

Apan wala pa gani sila makaabot sa laing imnanan gigukod na sila niini ug dinhi na nahitabo ang binatoay ug karambola.

Gitinguha ni Gingoyon nga ilang mailhan ang tanang na­lambigit sa kagubot ug ila ning ipatawag sa police station.

Nipasabot si Gingoyon nga ang iyang mga tawo magpatrolya gyud kini panahon sa kagabhion hangtod na sa kaadlawon apan sila lang ang gibantayan sa maong mga batan-on.

Kahihumdoman, nahitabo usab ang rambol sa mga ba­tan-on sa Barangay Yati, Liloan niadtong Mayo 9, 2024, diin usa ang patay ug tulo angol.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph