Kanihit sa tubig nasinati sa mga molupyo sa dakbayan sa Sugbo tungod sa huwaw mugna sa El Niño phenomenon.
Daan nang nipahibalo ang Metropolitan Cebu Water District (MCWD) nga nagkaubos ang supply sa tubig hinungdan sa ilang pagpasidaan sa unang 12 ka mga barangay sa dakbayan sa Sugbo, Mandaue ug Talisay nga apektado niini.
Ang MCWD nagrasyon na og tubig pinaagi sa direktang pagbutang o inject niini ngadto sa linya sa MCWD sa maong mga dapit.
Apan sa Dominggo, Abril 21, 2024, ang MCWD nipahibalo usab nga dunay mga dapit sa dakbayan sa Sugbo nga naapiki na usab sa tubig.
Naglakip kini sa mga barangay Busay, Lahug, Apas, Kamputhaw, Capitol Site, Sta. Cruz, Lorega San Miguel, Zapatera, Sambag 1 & 2, Calamba, Guadalupe, Labangon, Tisa, Punta Princesa, Mambaling, Basak San Nicolas, Binaliw, Pit-os, ug Talamban ingon man sa dan Ramos, dan Englis, dan Sikatuna, Banawa ug Tapoko.
Dugang sa MCWD, low pressure ngadto sa way tubig sulod sa 57 oras hangtod sa Martes, Abril 23, 2024, tungod sa preventive maintenance sa JE Hydro facility (bulk supplier sa MCWD) sa Barangay Lusaran.
Samtang, si San Nicolas Proper Barangay Captain Clifford Jude Niñal nihimo og lakang sa pagpakabana sa paghatod og tubig gamit ang multicab sa barangay ngadto sa mga residente sa Lower San Roque ug dan V. Rama sa Barangay Calamba. Matod pa sa mga molupyo nga nakasinati na sila og hinay nga agas sa tubig sud na sa usa na ka buwan. / RRM