Trabahante sa piggery patay human gidunggab samtang nag-disco niadtong alas 12:30 sa kaadlawon sa Biyernes, Agusto 2, 2024, sa Sityo Aluba, Barangay Bitoon, lungsod sa Daanbatayan, amihanang Sugbo.
Si Bryan Punay, hingkod, taga Sityo Libertad, Brgy. Bagay, Daanbatayan namatay human sa pipila ka minutos nga gidala sa tambalanan. Ang biktima nakaangkon og samad dinunggaban sa dughan.
Samtang ang suspek giila nga si Ruel Languido, alyas Jojo, hingkod, nagpuyo sa nahisgutang lugar, kinsa giingong nagdala’g gamay’ng kutsilyo.
Si Police Senior Master Sgt. Victor Avenido, imbestigador sa Daanbatayan Police Station nga nahinabi sa Superbalita Cebu, nagkanayon pwerting huboga sa suspek.
Ang biktima uban sa iyang mga higala nag-disco sa dapit kay adunay kapistahan.
Ang mga kauban sa biktima nakurat sa maong nahitabo kay gitagayan pa nila ang suspek og ilimnon apan kalit lang nanunggab.
Ang suspek bulontaryong nitahan sa kapulisan pagka alas 3:30 sa hapon sa Biyernes.
Sumala ni Languido nga wala sila nag-away sa biktima, gani wa siya makahinumdum tungod sa kahubog.
“Abi ra man daw niya iyang gisumbag ang biktima. Wala siya makahibalo nga gidunggab kay pwerti niyang huboga,” base sa sulti sa suspek.
Giingong gitan-aw siya sa biktima nga nagsayaw dayon gisumbag.
Ang suspek nitahan sa kaugalingon ngadto sa mga polis. / GPL