PATAY na nga napalgan ang usa ka 28-anyos nga lalaki nga gituohang nalumos samtang naligo og dagat sa Barangay Catarman, Lungsod sa Liloan kay nagselebrar sa adlaw’ng natawhan sa iyang kapuyo kuyog sa ilang duha ka anak niadtong Dominggo, Agusto 10, 2025.
Alas 7 pasado na sa buntag pagkasunod adlaw, Agusto 11, napalgan ang biktima nga si John Carlo Apundar, drayber sa usa ka trucking company nga taga Barangay Paknaan, Dakbayan sa Mandaue.
Matod sa sakop sa Coast Guard nga si PO2 Jason Flora, nauna na og pangita ang mga rescue personnel sa Liloan apan pagkadawat nila og tawag mga alas 7 pasado sa kagabhion, niresponde sab sila.
Apan pakyas ang ilang pagpangita hinungdan nga gipadayon nila ang rescue operation mga alas 4 na sa kadlawon og nakit-an ang biktima pagkaalas 7 sa buntag.
Si Donavie Coyoca, kapuyo sa biktima, nisaysay nga mga alas 3 pasado sa hapon niadtong Agusto 10, nananghid si John Carlo nga maligo sa unahan nga bahin sa dagat ug manguha og swaki kuyog ang mga kauban niini sa trabaho ug gibilin sa iyaha ang relo niini dungan sa pag-ingon nga paampingan.
Giingong gibadlong pa sa kauban ang biktima dihang nagtighaya-tighaya sa kadagatan ug nalapas kini sa mga buya apan pipila ka minutos ang nakalabay nag-isaisa na kini sa iyang mga kamot nga nangayo og tabang tungod kay matod pa nikalit og lawom ang dapit kay kantilado.
Ang mga kauban sa biktima nisuway unta pagtabang sa biktima apan napakyas tungod sa kakusog sa sug sa dagat hinungdan nga nangayo sila og tabang sa mga barangay tanod ug bantay dagat.
Apan ang biktima giingon’g nawagtang og kalit kay gituohang gianod sa sug.
Niangkon sab si Donavie nga kahibalo mulangoy ang iyang kapuyo apan dali ra kini kapuyon.
Gani hapit sab kini nalumos kaniadto duha ka higayon apan naluwas sa iyang mga kauban. / JDG