Patay ang usa ka 43 anyos nga lalaki human pusila alas 6:24 sa gabii, Miyerkules, Marso 19, 2025, sa Sitio Phantom, Barangay Lorega San Miguel, Dakbayan sa Sugbo.
Ang biktima giila nga si Edgar Calledo Devibar alyas Junlot, 43, residente ra usab sa maong lugar.
Sa imbestigasyon sa Parian Police Station 1 sa Cebu City Police Office (CCPO), nasayran nga duha ang mamumuno nga nag sul-ob og itom nga jacket ug itom nga karsones samtang ang usa naka-raincoat og yellow nga naka-short pants nga sakay sa motorsiklo. Ang duha niduol sa biktima ug dayong pusil.
Human sa pagpamusil yano lang kini nga nibalik sa motorsiklo dayong sibat.
Dali nga gidala ang biktkma sa Cebu City Medical Center samtang ang nga personnel sa Scene of the Crime Operation nakakuha og upat ka buhing bala sa crime scene, duha ka basiyo ug usa ka kabhang sa kalibre 45.
Matod ni Police Major Marvin Figarido, hepe sa Parian Police Station nga ang biktima usa ka drug personality ug makadaghan na madakpan.
Drugas ang ilang usa sa gitan-aw nga motibo apan wala usab nila wad-a ang posibilidad sama sa personal nga atraso ilabi na nga bag-o lang siya nakagawas gikan sa Cebu City Jail sa kaso gihapon sa illegal drugs.
Gipangsusi karon sa kapulisan ang mga kuha sa CCTV camera sa dapit ug ilang i-backtrack aron pag-ila sa mga mamumuno.
Ang CCPO nipalambo karon sa ilang police visibility lakip na ang checkpoints sa mga dapit nga dunay insidente sa pagpamusil.
Matod ni Police Colonel Enrico Figueroa, hepe sa kapulisan sa Dakbayan sa Sugbo nga gipalihok na niya ang tanan nilang imbestigador alang sa dinalian nga pagsulbad sa mga kaso sa pusil.
Hinuon gipasabot sa hepe sa CCPO nga sa mga kaso sa pusil halos tanan ila kining nasulbad human madakpan ug mailhan ang mga suspek ug napasakaan og kaso sa korte. / AYB