WANTED sa kasong murder ang nadakpan sa Lungsod sa Anda, Lalawigan sa Bohol niadtong alas 5:20 sa hapon, Miyerkules, Marso 12, 2025 pinasikad sa warrant of arrest.
Ang dinakpan nga si alyas Tar, 37, taga Purok 3, Barangay Bacong, Anda, Bohol.
Ang Anda Municipal Police Station naghupot og kopya sa warrant of arrest nga giluwatan ni Judge Jorge Espinal, Presiding Judge sa 7th Judicial Regional, Regional Trial Court Branch 51, Lungsod sa Carmen sa kasong murder nga way piyansa.
Matod sa hepe sa Anda MPS, Police Major Justine Hinlayagan nga human nga nahimo ang pagpatay niadtong Disyembre 3, 2007 nagtagotago na si Tar.
Nasayran nga duha ka tawo ang nipatay ngadto sa ila ra sab nga silingan, ang kauban ni Tar ang nadakpan na kaniadto ug kasamtangan nagserbisyo sa iyang sentensiya samtang si Tar nisibat paingon sa Luzon.
Dugang ni Hinlayagan nga nisaysay si alyas Tar nga nagbalhinbalhin siya og puyo sa didto sa Luzon ug nanginabuhi didto isip tricycle driver ug nisulod usab nga construction worker.
Niadtong katapusang semana sa Disyembre 2024 nakadawat og impormasyon ang kapulisan gikan sa ilang mga kaabag sa barangay nga niuli ang maong akusado sa ilang balay sa Barangay Bacong, hinungdan nga gi-monitor.
Nakig-alayon sila sa korte nga maoy naggunit sa kaso ug pagka-Marso 12, 2025 sa alas 5:20 sa hapon ilang gi-serve ang warrant.
“Ang biktima ani nila, ila ra sab nga silingan ilang kababata, ang usa karon wala pa kagawas kay nag-serve og sentence kay murder man, ang pagkahitabo insakto pa ang iyang (Tar) edad 18 anyos ang iyang pangedaron sa paghimo sa krimen. Nisibat dayon siya sa Luzon region kay nagtagotago man ni siya didto sa Batangas, Las Pinas, Caloocan basta upat to ka probinsya iyang gitagotagoan,” matod ni Hinlayagan.
Apan sa dihang nihimo og surveillance ang kapulisan sa Lungsod sa Anda ilang na-monitor nga anaa ra sa balay ang maong akusado ug gihatod ang warrant of arrest nga miresulta sa iyang pagkasikop.
Subay niini gidayeg ni Police Colonel Arnel Banzon, hepe sa kapulisan sa Lalawigan sa Bohol nga ang iyang mga personnel nga nakasikop sa maong wanted person nga nagtagotago sa dugay nga panahon.
“Kini nga pagdakop sa nagpamatuod sa walay paglubad nga paningkamot sa atong kapulisan sa pagdala sa hustisya. Dako ang among pasalamat sa Anda Municipal Police Station ug sa tibuok team nga naningkamot nga malampuson kining operasyon. Usa kini ka pahimangno sa tanang naglikay sa balaod, dili kamo makalikay hangtod nga makab-ot ang hustisya,” matod ni Banzon.
Dugang ni Banzon nga ang pagkasikop sa maong wanted person nagpamatuod kon unsa ang ilang dedikasyon pagpangita sa hustisya alang sa kahusay ug kalinaw sa tibuok Probinsya sa Bohol. / AYB