Gironda ang condominium unit sa usa ka American national sa mga sakop sa Philippine Drug Enforcement Agency (PDEA 7), alas 11:00 sa gabii sa Miyerkules, Nobiyembre 8, 2023, tungod sa taho nga ilang nadawat nga nananom kini og marijuana sulod sa iyang condo unit.
Ang PDEA 7 armado sa search warrant gikan sa korte batok sa suspek nga si William Lee Matteson, 75, lumad nga taga Nebraska sa Estados Unidos apan kasamtangang nagpuyo sa usa ka condominium sa Juana Osmeña Extension, Barangay Kamputhaw, dakbayan sa Sugbo.
Nakuha sa mga operatiba ang tulo ka tanom nga marijuana nga gibana-bana nga dunay market value nga P1,200 lakip sa napulo ka seedlings sa marijuana, usa ka plastic nga dunay sulod nga pinauga nga dahon sa marijuana, ug uban pa nga plastic nga dunay marijuana seedlings.
Matod ni Leia Alcantara, information officer sa PDEA 7, nakadawat ang ilang buhatan og taho labot sa American national nga dunay indoor marijuana grow kit alang sa iyang personal consumption apan giingong iya usab nga ihatag sa iyang mga higala nga langyaw.
Tungod niini, gipaubos nila sa tulo ka semana nga pagpaniid ug ilang nasuta nga tinuod ang kasayuran nga ilang nadawat.
Ilang gilusad ang ronda batok sa American national nga nagpuyo sa dakbayan sukad pa sa 2007.
Kalapasan sa Section 16 Article II RA 9165 o Comprehensive Dangerous Drugs Act of 2002 ang atubangon nga kaso sa suspek.