Nagtukod og balay sa nasunogan gipahunong

TITULADO?: Gisusi ni Lapu-Lapu City Mayor Junard Chan ang giingong titulo sa magtiayon nga nagtukod sa ilang balay nga way pagtugot sa Siyudad.
TITULADO?: Gisusi ni Lapu-Lapu City Mayor Junard Chan ang giingong titulo sa magtiayon nga nagtukod sa ilang balay nga way pagtugot sa Siyudad. LAPU-LAPU CITY PIO

Magtiayon nga dili apil sa mga nasunogan sa Sitio Sta. Maria, Barangay Pusok, dakbayan sa Lapu-Lapu niadtong Disyembre 2023 nangangkon nga nanag-iya og luna sa dapit.

Si Lapu-Lapu City Mayor Junard “Ahong” Chan gikatakda’ng makigtagbo sa magtiayon nga giingong nangangkon og bahin sa yuta sa Sityo Sta Maria, Brgy. Pusok ug nagpatukod og balay sa maong dapit bisan og dili sila apil sa mga nasunogan.

Buot masayran sa mayor ang legalidad sa ilang pagpanag-iya.

Sa Facebook Live niadtong Martes, Enero 9, gibisita ni Chan ang lugar diin nagpatukod sa ilang balay ang magtiayon nga sila si Datu Amihan ug Baenay Sampaguita.

Ang mayor mismo maoy nimando kanila sa paghunong sa ilang pagtukod.

Ang magtiayon nangangkon nga Lumad sa maong dapit.

Atol sa komprontasyon, gihangyo sila ni Chan nga ipakita ang mga legal nga dokumento nga nagsuporta sa ilang pag-angkon, diin ilang gipresentar ang mga papeles nga gi-isyu sa usa ka Datu Leon Kilat nga nangangkon nga tag-iya.

Gisubli ni Chan nga ang titulo sa yuta pribadong gipanag-iya ug gihatagan ang magtiayon hangtod sa Huwebes, Enero 11, aron ipresentar sa iyang opisina ang ilang legal nga mga dokumento.

Matod niya nga nakahukom siya nga manginlabot ug makig-estorya sa magtiayon human nangayo og tabang ang barangay kapitan sa Pusok, Ranie Emperio, human siya nakadawat og mga reklamo bahin sa magtiayon gikan sa pipila ka mga residente.

“Gi-ari ta mo diri kay niingon mo nga way magbuot kay Lumad mo ug naa moy kaugalingon. Ang City nagre-­blocking dinhi, dili kita magpataka og tukod. Pero magbuot-buot lang mo patukod diha, wala na mi ninyo girespeto,” pakigpulong sa mayor ngadto sa magtiayon atol sa iyang Facebook Live.

Kapin sa 1,575 ka mga pamilya ang nawad-an og panimalay sa Sitio Sta Maria human gilamoy sa kayo ang ilang mga balay pipila ka adlaw sa wala pa ang Pasko niadtong Disyembre 15.

Gawas sa paghatag sa mga biktima og cash assistance, si Chan niingon nga sa sayo pa nga tugotan lang sa Siyudad ang mga biktima nga tag-iya og balay nga makabalik ug makatukod sa ilang mga balay human sa reblocking.

Sa laing bahin, ang mga tag-iya sa balay ang magbuot sa pagtugot sa mga nag-abang nga makabalik, basta sila mopuyo uban kanila.

Gisugyot ni Chan ang reblocking sa maong lugar hu­man ang buhatan sa Bureau of Fire Protection (BFP) La­pu-Lapu niasoy nga decongested ang lugar kay daghan og mga balay ug hagip-ot ang agianan hinungdan nga angay nga i-reblocking aron mahan-ay ang pagtukod og balik sa mga balay.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph