NAPALGAN nga wala nay kinabuhi ang usa ka senior citizen gikan nanguha og lubi sa Sitio Bagacay, Barangay Canbatug, Lungsod sa Argao niadtong Hunyo 24, 2025.
Ang biktima nakit-an dapit sa sapa sa maong dapit nailhan nga si Felicisimo Albite, 77, minyo ug residente ra sa nahisgutang dapit.
Sa gihimong imbestigasyon sa Argao Police, nakadawat sila og tawag gikan sa secretary sa maong barangay mga alas 10:02 sa buntag, Hunyo 24, nga nagpahibalo nga dunay nakit-an nga patay nga lawas.
Daling niresponde ang kapulisan sa maong taho ug naabtan nila ang biktima nga giila mismo sa asawa niini.
Dugang imbestigasyon sa kapulisan nasayran nga ang maong biktima niadto sa iyang umahan niadtong Hunyo 23, sa alas 9:00 sa buntag aron manguha og mga lubi apan naabot nalang ang kagabhion wala gihapon kini nauli sa ilang panimalay.
Tungod niini, nakadesisyon ang pamilya sa biktima nga pangitaon inabagan sab sa mga opisyales sa maong barangay apan nagabhian na lang sila ug wala siya nakita.
Nipadayon ang pamilya sa biktima sa pagpangita pagkabuntag Hunyo 24, ug ila ning napalgan duol sa sapa nga nagtuwad ang porma nga wala nay kinabuhi.
Human sa pagsusi sa Scene of the Crime Operatives (Soco) gikataho nga aduna silay nakita nga samad sa ulo ug nagkadugo nga gituohan nga siya natagak.
Bisan gikonsiderar nga walay foul play ang nahitabo sa biktima ipaubos gihapon sa pamilya ang namatay sa autopsy aron mahibaw-an kon unsa ang hinungdan sa kamatayon niini. / JDG