Gikatahong nagyawyaw kay wala pautanga ang gipusil sa alas 6:20 sa gabii, Huwebes, Agusto 1, sa Sityo Magic, Baranga Poblacion, Toledo City.
Samaran sa iyang tuo nga abaga ug bukton si Sajid Atillo Bobilles, 32, dunay kapuyo ug residente sa naasoy’ng dapit.
Nasikop si Rodnil Nillas Lebumfacil, alyas Boknoy, 33 , adunay kapuyo, panday, nga taga-Barangay Ibo, Toledo City.
Matod ni Police Staff Sgt. Jonever Manabat, imbestigador sa Toledo Police Station nga giingong nangutang ang biktima ngadto sa suspek alas 4:00 sa hapon, Huwebes.
Apan gibalibaran sa suspek kay wala pa siyay kuwarta apan nitumaw na hinuon ang panaglalis sa duruha.
Pagkagabii nagbarog ang biktima daplin sa dalan ug miabot ang suspek sakay sa motorsiklo og mipusil sa biktima sa makadaghang higayon.
Matod ni Police Staff Sgt. Manabat nga sigun ni Lebumfacil nga adunay gisudya ang biktima nga nakapapungot sa suspek.
Samtàng, si Lebumfacil nga nahinabi sa Superbalita Cebu mihimakak sa pangangkon sa biktima.
Ang suspek niingon nga dili isyu sa kwarta ilang away apan gihudlat siya sa biktima nga kalit lang siya'ng gisulong ug gihulgang dunggabon.
“Gihana-hanaan ko niya og dungab sa ice pick naglagot ko,” dugang sa suspek .
Pasangi pa ni Lebumfacil nga ang biktima nalambigit sa pagpamaligya’g drugas ug iyang nakauban sa dihang aduna silay project sa pagpamanday sa Poblacion, Toledo. / GPL