Lalaking pasahero sa usa ka bus sa Sunrays Bus Lines nahagbong sa national highway sa Barangay Pugalo, lungsod sa Alcoy, habagatang Sugbo, alas 4:10 sa hapon, Miyerkules, Hulyo 31, 2024.
Sa pagsubay sa Superbalita Cebu, ang biktima nailhan nga si Roberto Legarte Vallaso, 36, minyo, taga Barangay El Pardo, lungsod sa Boljoon, habagatang Sugbo.
Si Vallaso, usa ka laborer sa Marmelec Corporation sa Pugalo sa Alcoy, gideklarar nga dead on arrival (DOA) sa Bogo Argao District Hospital sa lungsod sa Argao.
Sa pakighinabi ni P/Staff Sgt. Ryan S. Pacaldo nga nihimo og imbestigasyon ubos sa kamandoan sa officer-in-charge (OIC) sa Alcoy Municipal Station nga si P/Capt. Jerry De Castro Magsayo, ilang nadawat ang taho kalabot sa aksidente busa ilang girespundihan dayon.
Nasayran nga ang bus gimaniho ni Midel Vequizo, 39, minyo, taga Barangay Gawi, lungsod sa Oslob, habagatang Sugbo, padulong sa habagatang bahin.
Giingon nga hinay ang dagan sa bus kay nagsunod kini sa usa ka tricycle ug ang biktima nigukod ug nikabyon sa pultahan sa bus.
Apan aksidenteng naligas ug nabunal sa dan nga maoy nakaingon nga siya nakaangkon og grabeng kadaut sa lawas.
Dali siyang gitabang sa mga rescuer sa Alcoy ug gidala sa labing duol nga ospital apan namatay.
Atol ning pagsuwat, ang drayber sa bus gitanggong sa kapulisan samtang nagpaabot sa reklamo sa pamilya sa biktima.
Sumala sa kapulisan, hayan mapasakaan kini og kasong reckless imprudence resulting to homicide.
Wa pa usab masayri sa Superbalita Cebu ang habig sa tagdumala sa Sunrays. / DVG