Ang Strong Group Pilipinas kompara Chinese Taipei Blue mao na hinuon ang natagak og dili makaabante sa semifinal round sa 2026 Jones Cup nga gipahigayon didto sa Taiwan.
Gitapos sa two-time defending champion Strong Group Pilipinas ang torneyo bitbit ang 5-1 (win-loss) record nga anaa sa ikaduhang pwesto sa ilang bracket, samtang ang host nga Taiwan nagkupot lang og 1-5 nga baraha.
Ang Strong Group-Pilipinas anaa sa ikaduhang pwesto sunod sa Wonju DB, nga nagbitbit pud og susamang 5-1 rekord apan nakapabor sa quotient maong sila ang nakakuha sa unang pwesto.
Kon basehan sa milabay nga mga tuig ang Wonju DB ug SG-Pilipinas na unta ang sulod sa ilang bracket, apan nausab karon nga tuig tungod sa gihimo sa organizer.
Karong tuiga gihatag na sa Chinese Taipei ang usa ka slot, kini napasabot nga tagak ang naa sa ikaduha nga pwesto kay ihatag naman kini sa host team.
Gipasabot sa Chinese Taipei Basketball Association nga kini nga maong format gibuhat para makatan-aw pa ang local fanas sa ilang national team nga maabot sa layo nga bahin sa maong torneyo.
Nasagmuyo ang Strong Group sa maong polisiya ug ila kining gipakita sa uwahing duwa diin gilubong nila ang Taipei Blue ug 43 puntos, 111-74, niadtong Biyernes.
“We wanted to really blow out Taipei to show that we were the ones who deserved to be playing for the championship,” batbat ni head coach Charles Tiu. / RSC
