Wala na kapugngi sa 51 anyos nga amahan ang iyang kalagot ngadto sa iyang 25 anyos nga anak lalaki nga gihulagway nga drug user sa dihang iyang naabtan sa iyang pagpauli nga nanghasi ngadto sa iyang mga manghod.
Inay nga mopatuo ang biktima nga si Renato Castañares sa dihang nipatunga ug nibadlong ang amahan nga si Ramonito Bihag, gitukmod na hinuon ug bunalan unta og tubo.
Apan dali nga nakakuha og sundang ang suspek ug iyang naunhan og tigbas ang anak.
Base sa imbestigasyon ni Police Staff Sgt. Gemini Adalim, Consolacion Police, sigon sa asoy ni Ramonito nga niadtong alas 10:30 sa gabii, Miyerkules, Enero 15, naabtan niya sa ilang balay sa Purok Tulip, Brgy Casil, Lungsod sa Consolacion nga ang biktima nidapog ngadto sa iyang mga manghod kay wala kauyon sa gibilin nga sud-an.
Ang suspek gikan namasahero og habal-habal ang nibadlong sa biktima sa dihang gisigehan og dapat ang menor de edad niini nga manghod babaye ug ang 18 anyos nga igsuong lalaki.
Nasuko na hinuon ang biktima og nisukol sa amahan, gani nikuha pa kini og tubo aron nga bunalan, apan dali nga nakakuha og sundang ang suspek dungan sa pagtigbas ug dunggab sa iyang anak sa makadaghang higayon.
Gideklarar sa mananambal nga dead-on-arrival si Castañares.
SELF DEFENSE
“Akoa depensa lang ba, giunhan nako siya kay ako na unya ang mamatay,” saysay sa amahan sa dihang nahinabi sa mga tigbalita.
Sumala pa nga sa higayon nga anaa ang biktima sa ilang balay, ang mga manghod dili ganahan magpabilin tungod kay manapog ug maninghag nga walay igong rason.
Adunay higayon nga magluya tungod sa bisyo ug magsige na lang og katulog, apan kon makamata na isog kaayo tungod kay gigutom.
“Mangayo'g pagkaon kon dili makauyon, ilabay ang sud-an ug kan-on,” sigon pa sa suspek.
Kon manghasi sab kini, ilabay og apil ang kaldero ingon man ang plato. Gisigehan na kini og badlong sa amahan nga dili magsige og wild kay ma-trauma ang iyang mga manghod nga nag-eskuwela.
Giangkon sa suspek nga naguol siya sa nahitabo sa iyang pamilya ug iya na lang dawaton ang kamatuoran ug pagabayran iyang nahimong pagpatay. Ang biktitma maoy ikatulo sa pito ka mga igsuon.
Kasong parricide ang giandam sa kapulisan batok sa amahan. / GPL