Taas nga tuig gyud diay ang gisubay sa Oklahoma City Thunder ug giapilan pa og swerte sa pagkaporma karon sa ilang dynasty sa National Basketball Association (NBA).
Ang Thunder mao ang defending champion og nag-una pud kini sa regular season.
Gipili ang maong team sa mga eksperto nga maoy modaog karon tuiga ug mohimo sa ilang back-to-back championship.
Gipangulohan ang team sa reigning Most Valuable Player nga si Shai Gilgeous-Alexander.
Kon subayon taas ang giagian sa team gikan sa mga trade para maabot ang karon era ni SGA. Dako nga rason niini ang trade nga nahitabo ni Rashard Lewis tuig 2007.
Sa dihang gipadala sa Sonics (nga Thunder na karon) si Lewis ngadto sa Orlando Magic, wala nagtinguha si Sam Presti og mga magduduwa isip baylo; mas gipili niya ang usa ka Trade Exception.
Gigamit niya kini nga exception aron dawaton ang suweldo ni Kurt Thomas gikan sa Phoenix Suns. Isip bayad sa pagtabang sa Suns nga makalingkawas sa ilang cap space, gihatagan sa Suns ang OKC og duha ka first-round draft picks.
Usa sa maong mga picks gikan sa Kurt Thomas deal nahimong si Serge Ibaka (24th pick niadtong 2008). Nahimong haligi si Ibaka sa panahon nila ni Durant ug Westbrook, apan ang iyang tinuod nga bili nigawas katuigan ang nilabay sa dihang gi-trade na siya.
Si Ibaka gi-trade niadtong 2016 para makuha silang Victor Oladipo ug Domantas Sabonis. Sila si Oladipo & Sabonis gi-trade niadtong 2017 para makuha si Paul George.
Si George gi-trade niadtong 2019 para makuha si Shai Gilgeous-Alexander.
Kadtong usa ka lihok niadtong 2007 mao ang nagsilbing dalan sa Thunder para sa panahon ni SGA. / RSC