Patay ang usa ka sakop sa dance group nga nahulog sa hagdanan sa entablado sa dayong tikang niini sa pagkanaog human sa ilang pagsayaw atol sa 'Enchantress of Inayawan 2024', beauty pageant sa mga bayot, sa Barangay Inayawan, dakbayan sa Sugo niadtong Miyerkules sa gabii, Agusto 21, 2024.
Ang namatay giila nga si Jaylord Gabor, hamtong ang panuigon, kansang video sa hitabo nag-viral sa social media nga nakita ang pagkatiurok sa iyang ulo ngadto sa sementado nga sawog sa gym sa Inayawan.
Si Gabor ulahing nikanaog uban sa iyang mga kaubang dancer padulong na mo-exit ug ang mga kandidata ningrampa na usab og balik sa entabldo atol sa hitabo.
Sumala sa mga saksi, si Gabor sama sa dunay gipamati sa lawas hinungdan nga wala nakabalanse sa dayong pagtikang sa pagkanaog hinungdan nga nahulog gikan gyud kilid sa entablado.
Si Gabor daling gitabang sa mga nagbantay nga personnel sa barangay ug gidala sa labing duol nga ospital apan nakabsan gyud sa iyang kinabuhi human sa pipila ka mga oras.
Si Barangay Kapitan Kirk Bryan Jaca Repollo nipagawas og pamahayag sa ilang opisyal nga Facebook page sa barangay nga nagkompirmar sa masulub-ong hitabo ug nipadangat og pahabuso sa pamilya sa biktima.
Lakip sa pamahayag ni Repollo mao ang pagsaad nga mohatag og ayuda sa pamilya sa namatay.
Ang 'Enchantress of Inayawan 2024' usa sa mga kalihokan sa nag-angat nga kapistahan sa patron sa kapilya sa barangay nga si St. Augustine of Hippo matag kataposang Dominggo sa Agusto.
Nanawagan usab si Repollo sa publiko sa pag-ampo alang sa kapahuwayan sa dayon sa batan-ong si Gabor.
Bisan sa maong panghitabo, malampuson ang pagtapos sa 'Enchantress of Inayawan 2024' niadtong gabhiuna. / DVG, GPL