Namatay ang panday human matusok sa buwang iyang wala nga paa alas 2 sa hapon sa Sabado, April 26, 2025 sa Brgy. Lanas, Dakbayan sa Naga, Sugbo, dihang nalangay sa pagdala sa ospital.
Si Antonio Cañada Restauro, 52, minyo, taga Purok Center, Brgy. Tagjaguimit, Naga, gideklarang dead on-arrival (DOA sa tambalanan sa Naga nianang pagka-gabii.
Si Police Master Sergeant Aristeo Tampus, imbestigador sa Naga City Police Station, mibutyag sa Superbalita Cebu nga ang biktima nahutdan sa dugo sigun sa report sa doktor.
Matod ni Tampus nga ang biktima uban sa iyang ig-agaw nga si Mario Restauro, 43, ug mga higala niadto sa Lanas aron magbaid sa buwang.
Giingon’g piyesta sab sa maong lugar og niapil og tagay ang biktima samtang nagbaid sa buwang sa manok igtatari.
Samtang nagba-id gitrapohan niya’g oil ang buwang aron mawala ang taya pero aksidente kini nga na-slide sa iyang kamot ug natusok ang iyang wala nga paa.
"Wala nila dalha dayon ang biktima sa hospital! Gibugkusan ra nila ang samad sila ra ang nagtam-tambal," sumala ni Tampus.
Unya dihang naluya na og maayo ang biktima, una pa kini nila gidala sa tambalanan.
Gibutyag ni Tampus nga kumpiyansa kaayo human ang dakong ugat sa paa maoy naigo sa buwang. / GPL