Kuwarentay tres ka mga pamilya sa Barangay Mabolo, Dakbayan sa Sugbo ang nagtukod sa ilang mga payag-payag sa North Reclamation Area (NRA) human ang korte nimando sa pagdemolis sa ilang kabalayan niadtong miaging buwan.
Ang mga residente kanhi nagpuyo sa Sitio Laray Holy Name, gipugos sa pagpapahawa sa ilang pinuy-anan human mapilde sa kaso nga gipasaka sa tag-iya sa luna nga ilang giukopar.
Si Mayor Raymond Alvin Garcia nitugot sa mga apektadong pamilya nga kasamtangan nga moukopar sa Block 27 nga gipanag-iya sa kagamhanan sa Dakbayan sa Sugbo samtang gipangitaan pa og pirmanente nila'ng kapuy-an.
Si Ronald Anthony Librando, pangulo sa Division for the Welfare of the Urban Poor (DWUP) nagkanayon nga ang mga pamilya gitugotan nga makatukod og kapuy-an apan mga light materials ang gamiton.
Ang siyudad gitakda nga mopalit og usa ka ektarya nga luna sa Barangay Pit-os nga magsilbe nilang permanente nga relocation site.
“We will offer it to them for their permanent relocation,” matod ni Librando.
Sigon ni Librando nga ang mga pamilya papirmahon og undertaking nga magtugot kanilang mopuyo sa Block 27 sud sa unom ka buwan ngadto sa usa ka tuig.
Matag pamilya makadawat og tag P30,000 nga financial assistance gikan sa siyudad. / JPS