Nabalhog sa Inayawan Police Station kadtong lalaki nga nitulis sa E-Bike driver ug gikuha ang iyang gimaneho nga E-Bike niadtong Martes sa gabii human maalarma nga armado, alas 12:35 sa kaadlawon, Huwebes, Hunyo 5, 2025, sa Sitio Fatima, Barangay Basak Pardo.
Ang dinakpan giila nga si Rixell Remedio Taborada Jr. alyas “Jako”, 26, taga Sitio Bogo 1, Barangay Quiot, Dakbayan sa Sugbo.
Nakuha gikan kaniya ang 5 gramos sa gituohang shabu nga mobalor sa P34,000 ug usa ka kalibre .38 nga pistola nga dunay buhing bala.
Sa imbestigasyon sa Inayawan Police Station 7, nakadawat sila og tawag sa telepono nga dunay armado sa Sitio Fatima, Barangay Basak Pardo nga maoy hinungdan nga dali sila nga niresponde.
Sa pag-abot sa mga polis, ilang naabtan ang suspek nga dunay armas sa iyang hawak nga maoy hinungdan nga ila kining gipusasan.
Sa paghiling sa mga polis sa bulsa sa suspek, nakuhaan siya og mga pinakete sa gituohang shabu nga giingong iya pa unta nga ibaligya.
Dunay usa ka saksi nga nitumbok kang Jako nga maoy nagtulis sa usa ka E-Bike driver ug niimbargo sa iyang E-Bike base sa hulagway nga nakuha sa CCTV camera nga gi-post sa kapitan sa Barangay Basak Pardo nga si Cebu City Councilor-Elect Dave Tumulak.
Nihimo dayon og follow-up operation ang kapulisan ug ilang nakuha pagbalik ang E-Bike didto sa Dakbayan sa Talisay.
Tungod sa maong kalambuan nagpasalamat si Tumulak sa kapulisan sa Inayawan ug sa Cebu City Police Office sa daling kasulbaran sa maong krimen.
Matod ni Tumulak nga dako kaayo og natabang ang mga CCTV camera sa ilang barangay nga maoy hinungdan nga daghan sa iyang mga residente ang nitabang aron mailhan kini.
Base sa gihimong background investigation sa kapulisan, ang suspek niadto lang Agusto 2024 nakagawas gikan sa bilangguan human makaserbisyo sa iyang 6 ka tuig nga sentinsya sa kaso sa ilegal nga drugas. / AYB
