39,000 PTS: Misenyas og tres si LA Lakers superstar LeBron James human siya nakapasulod og three-point shots batok sa Utah Jazz sa usa sa mga aksyon sa NBA ning Miyerkules, Nobiyembre 22, 2023 (PH time). Ning sangkaa, mikulit og kasaysayan si James isip labing unang magduduwa nga nakaabot og 39,000 ka mga puntos. / AP PHOTO
39,000 PTS: Misenyas og tres si LA Lakers superstar LeBron James human siya nakapasulod og three-point shots batok sa Utah Jazz sa usa sa mga aksyon sa NBA ning Miyerkules, Nobiyembre 22, 2023 (PH time). Ning sangkaa, mikulit og kasaysayan si James isip labing unang magduduwa nga nakaabot og 39,000 ka mga puntos. / AP PHOTO

Naka-39,000 points na si Lebron

Nakakulit na sab og laing kasaysayan si LeBron James human niya natabangan ang host Los Angeles La­kers sa paglampurnas sa U­­tah Jazz, 131-99, ning Miyerkules, Nobiyembre 22, 2023, sa National Basketball Association (NBA).

Si James, kinsa mao nay naggunit daan sa NBA all-time scoring record, nahimong la­bing unang magduduwa sa kasaysayan nga nakaabot og 39,000 ka mga puntos.

Iya kining naabot sa sayo’ng bahin pa lang sa duwa dihang nakapasulod siya og three-point shot.

Pagkahuman sa kombati, na­katampo si James og 17 puntos.

Si James, kinsa kanhi four-time MVP ug nagpatong na sa iyang ika-21 ka mga tuig sa NBA, sulod lang sa 24 ka mga minutos nga niduwa ning sangkaa.

Ang 38 anyos nga magduduwa wala na kaayo gibabad su­lod sa korte gumikan kay ma­ayo man nga nakaduwa ang iyang mga kauban.

Ang Lakers gipangulohan ni Anthony Davis pinaagi sa iyang 26 puntos ug 16 ka rebounds, nidugang og 20 puntos si D’Angelo Russell, niamot og 19 puntos si Austin Reaves samtang nitunol og 16 puntos si Christian Wood.

Aduna pa’y laing duha ka mga sakop ang Lakers nga nakahimo og dobleng mga numero nga mga puntos.

Kontrolado sa Lakers ang kinatibuk-ang kombati ug aduna pa’y higayon nga ningburot sa 30 puntos ang ilang labaw.

Si James, kinsa nag-ave­rage og 27.2 puntos, 7.5 ka rebounds, 7.3 ka assists ug 1.5 ka steals sulod sa 1,434 ka regular season games, nisugod sa duwa nga nagkinahanglan na lang og dugang lima ka mga puntos aron abton ang bag-o niyang kasaysayan.

Ang Jazz gipangulohan ni Omer Yurtseven pinaagi sa iyang 18 puntos, nidugang og 15 puntos si John Collins samtang niamot og 14 puntos si Collin Sexton.

Related Stories

No stories found.
SunStar Publishing Inc.
www.sunstar.com.ph