Nakaipsot ang Lakers sa Clippers

OVERTIME: Miitsa si Los Angeles Lakers forward Anthony Davis (tunga) batok nila ni Los Angeles Clippers forward Paul George (wa) ug center Mason Plumlee ning aktuha sa usa sa mga aksyon sa NBA ning Huwebes, Nobiyembre 2, 2023 (PH time). Midaog ang Lakers ning sangkaa pinaagi sa overtime. / AP PHOTO
OVERTIME: Miitsa si Los Angeles Lakers forward Anthony Davis (tunga) batok nila ni Los Angeles Clippers forward Paul George (wa) ug center Mason Plumlee ning aktuha sa usa sa mga aksyon sa NBA ning Huwebes, Nobiyembre 2, 2023 (PH time). Midaog ang Lakers ning sangkaa pinaagi sa overtime. / AP PHOTOMark J. Terrill

Nagpakatap og 35 puntos ug 11 ka rebounds si LeBron James aron agakon ang Los Angeles Lakers ngadto sa overtime nga kadaugan batok sa Los Angeles Clippers, 130-125, ning Huwebes, Nobiyembre 2, 2023 (PH time) sa National Basketball Association (NBA).

Mao kini ang labing unang daog sa Lakers batok sa Clippers gikan niadtong Hulyo, 2020, atol sa Florida bubble season.

Naputol sab niini ang 11 ka sunodsunod nga homecourt nga kapildihan sa Lakers batok sa Clippers nga nagsugod niadto pang 2016.

Ningtabang og dako ni James aron mahitabo kining tanan mao sila si Anthony Davis ug D’Angelo Russell, kinsa ningmugna og 27 puntos matag usa.

Ang Clippers gipangulohan ni Kawhi Leonard pinaagi sa iyang 38 puntos samtang nidugang og 35 puntos si Paul George diin 20 niini iyang gimugna sa 4th quarter.

Bisan ningkombati ang La­kers nga aduna ra’y walo ka mga magduduwa, nakamaneho gihapon sila pagbangon gikan sa 19 puntos nga pagkalubong.

Sa nahabiling 1:44 minutos sa 4th quarter, nakalabaw pa og walo ka mga puntos ang Lakers, 114-106.

Sa wala damha, naka-rally ang Clippers hangtod nga natabla nila ang kombati, 117-117, sa nahabiling 17 ka mga segundos sa regulation period pinaagi sa tulo ka freethrows ni George ug mao na kini ang nakapugos og overtime.

Grabe ka sikit ang engkuwentro sa overtime ug sa dihang nakarehistro ang Lakers og tulo lang ka mga puntos nga labaw, 122-119, sa nahabiling tulo ka mga minutos, wala na sila motugot nga mailog pagbalik sa Clippers ang bintaha.

Ning sangkaa, wala pa niduwa ang bag-ong haligi nga nakuha sa Clippers nga si James Harden.

Sila si Harden ug P.J. Tucker opisyal na nga nabalhin sa Clippers gikan sa Phildelphia 76ers sa usa ka blockbuster trade sa wala pa nagsugod ang duwa apan sa ilang duha, si Tucker pa lang ang niduwa isip Clipper.

Wala’y nahimong puntos si Tucker sulod sa 21 ka mga minutos nga pagduwa.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph