Usa ka nakapadaog nga buzzer-beater jumper ang ningtuldok sa halandumong gabii alang sa Sugboanong higante nga si June Mar Fajardo atol sa kulbahinam nga daog sa San Miguel Beermen batok Rain or Shine Elasto Painters, 113-112, niadtong Huwebes, Septiyembre 6, 2024, sa Philippine Basketball Association (PBA) Season 49 Governors’ Cup sa Ninoy Aquino Stadium.
Human ning maong duwa, ang produkto sa University of Cebu (UC) Webmasters nakapatong na sa Top 10 sa all-time career rebounding list ug all-time career free throws made.
Si Fajardo, kinsa nakalangkat og 21 rebounds ning maong duwa, nakatigom na og 5,846 rebounds nga nagpahiluna kaniya sa ikapitong puwesto nga iyang nailog gikan ni rebound legend Philip Cesar.
Si Cesar niretiro bawon ang 5,834 rebounds nga iyang nahimo sulod sa 17 ka mga tuig.
Ang kasamtangang napundo nga rebounds ni Fajardo iyang nahimo sulod lang sa 10 ka mga tuig ug padayon pa ang ihap.
Ang lumad nga taga lungsod sa Pinamungajan, Cebu nakamugna sab og lima ka freethrows sa duwa.
Sa kinatibuk-an, 2,096 na ka freethrows ang napasulod ni Fajardo, kinsa nakatabla ni Danny Seigle sa ika-10 nga puwesto ning maong listahan. / ESL